و انا قاعدة النهاردة مع حبايبي مينا و احمد و اسلام مش عارفة ليه حسيت بسعادة كبيرة جدا
قاعدة مع مصريين بجد في خفة الدم و الروح و الكرامة اللي بنتميز انها بتنقح علينا دايما و دي زي ما قلت ميزة بتظهر قوي في المصريين
انتظارهم و القعدة معاهم خللتني سعيدة بيها و اتمناها تاني
في مدونتي اللي فاتت قلت اني خرجت من الدورة بكم اصدقاء كبير في عدده و معناه و احمد و مينا و اسلام ضمن المجموعة دي
نسيت اقول انه كان في غداء عمل بيني و بين مينا لاني انا و هو هناخد خطوة جديدة هيبان اثرها بعدين
و بالفعل قمنا و عزكني في ماك دونالدز و اتكلمنا في الموضوع ده و حصل هناك موقف بايخ اتمنى هو يحكيه
ناسية حاجة تانية اقولها
اه.......افتكرت
محمد فاضل كنت قلقانة عليه جدا جدا جدا بسسب اني عرفت ان منعقد ليه مجلس تاديب في الكلية و دوخت علشان اطمن عليه فشلت في البداية لكتي نجحت بعدين
و بالفعل كلمني و طمني عليه
بجد فرحانة باصحابي قوي
ربنا يبارك لي فيهم
فعلا...............اصحابي و حبايبي
ملاحظة: الصور دي اولها رمز مدونة مينا و التانية رائعة غالي شكري اللي بيعتز احمد بيها مالقيتش اجمل من كده اعبر بيه عنهم
4 comments:
الله يسامحك يا شيخة
فكرتيني برائعة الحزب الوطني الغنائية الملحمية بتاعة يبقى انت أكيد - لا مؤاخذة - في مصر... واضح إن تأثير الدورة اللي كان نص شبابها من الوطني أثر عليكي جدا... بس الحمد لله مش الإخوان هم اللي أثروا فيكي وإلا كنا هنلاقيكي ربيتي دقنك وحطيتي زبيبة وبتقولي... حيييييييييي
اللطيف في قعدات المدونين دي إنها قعدات خطيرة جدا ويتخاف منها لأنك مش ضامن أنهو مدون هيسيح لك تاني يوم في مدونته... علمناهم التدوين فضحونا ع الابواب....... ههههههههههههه
مدام بقى المواضيع تسييح بتسييح يبقى إليكم نشرة الأنباء الفضائية بالتفيل من العمرانية... إحنا (دعاء وأنا يعني) روحنا نتغدى في مكدونالد (دا معناه إننا اعتذرنا من الناس اللي كانوا معانا وسبناهم ومشينا) واخترنا مكدونلد عشان فيه واي فاي فنقدر نحضر للموضوع الصحفي اللي كنا بنجهز له مستفيدين من النت القوي اللي في ماك.... طبعا روحنا وطلبنا وأكلنا ودفعنا خمسة وتلاتين جنيه تمن وجبتي بيج ماك وكمان نسيت آخد باقي الخمسين جنيه وفي الآخر طلع النت واقع من السنترال فضاعت الفلوس وضاع الموضوع بس الحق يتقال السندوتشات كانت حلوة أوي.... شفتوا الهنا اللي انا فيه
قمة المسخرة والعبثية... لأ والأكادة إيه بقى إن الأستاذين أحمد بيه وإسلام إكسيلانس اشتغلوني أفضل اشتغال على أساس إن "الموعاد الغرامي" باظ... وشمتوا فيا شماتة ولا شماتة أبلة ظاظا لما عرفوا بضياع الفلوس وبسقوط النت... مش ممكن يا اخوانا السواد اللي بقى في قلوب الناس ده يا ربي... الواحد ميعرفش يحضر موضوع صحفي مع صحفية زميلة... يا ابوي على القر والحقد الأنوي اللي في قلوب الناس
ولا أجد ما أقول في الختام سوى الدعاء إلى الله بأن يكفيني شر أصدقائي وأما أعدائي فأنا كفيل بهم
علي فكره يا مينا انت ودعاء
مكدونلاد مقاطعه عشان امريكاني
شفت ربنا عمل فيكم ايه ؟؟؟؟
أما بقه بخصوص الذبيبة وحيييييييييييييي فهسيب دعاء ترد عليك وحسابنا لما اشوفك يامان
يا احمد يا عزيزي
اقرا الخبر كويس ماكدونالد هو اللي قاطع دعاء ومينا طالما هم مش قاطعوه ههههه
Post a Comment