المتميز.......مجدي مهنا

مش كتير عليه ده

كاتب جميل و مؤثر و قادر انه يربط و يوصف بشكل لذيذ جدا

و اللي تابع فيكم مقالته عن قرار المجمع الكنسي بفصل جورج حبيب بباوي تعرف قد ايه هو انسان صاحب موقف و مخ بيفكر و يحلل

اعتقد انه البابا لو قرا المقال ده مش هتقومله قومة

لاحظوا اسقاطه لفكرة الحق على البابا و الرئيس و امين لجنة السياسات و وزير الداخليةو كمان شيخ الازهر

و كأنه جمع كل حبايبنا الحلوين اللي لو اتصرفا زي البابا كده -ولو انهم بيتصرفوا بطرق تانية لنكون فعلا في دولة غاب

طب هتسالوا نفسكوا ازاي دولة غاب و فيه - زي ما قال البابا- قبضة الحق؟

و الاجابة ببساطة من الكلمة نفسها "قبضة"

القبضة اللي عيشتنا في الطوارئ 25 سنة

القبضه اللي هتحط قانون جديد للارهاب هيبقى قانون دايم مش استثنائي زي الطوارئ ما بالك الاستثنائي قعد 25 سنة امال اللي جاي هيقعد قد ايه؟

القبضة اللي معيشة البلد حالة غليان بسبب الاسعار

القبضة اللي مخليه المواطن العادي ماشي يكلم نفسه في الشارع

القبضة اللي حكمت على كريم عامر 4 سنين

القبضة اللي مستهدفة الاخوان و ده اقوى دليل على خوفها و عدم احكامها للي اسمها القبضة

كفاية كده

مجدي مهنا بجد كاتب متميز

ادعوكم انكم تقروا له

-

http://http://www.almasry-alyoum.com/article.aspx?ArticleID=49161&r=t

خفة دم و جدعنة...........يبقى اكيد مصريين

و انا قاعدة النهاردة مع حبايبي مينا و احمد و اسلام مش عارفة ليه حسيت بسعادة كبيرة جدا

قاعدة مع مصريين بجد في خفة الدم و الروح و الكرامة اللي بنتميز انها بتنقح علينا دايما و دي زي ما قلت ميزة بتظهر قوي في المصريين

انتظارهم و القعدة معاهم خللتني سعيدة بيها و اتمناها تاني

في مدونتي اللي فاتت قلت اني خرجت من الدورة بكم اصدقاء كبير في عدده و معناه و احمد و مينا و اسلام ضمن المجموعة دي

نسيت اقول انه كان في غداء عمل بيني و بين مينا لاني انا و هو هناخد خطوة جديدة هيبان اثرها بعدين

و بالفعل قمنا و عزكني في ماك دونالدز و اتكلمنا في الموضوع ده و حصل هناك موقف بايخ اتمنى هو يحكيه

ناسية حاجة تانية اقولها

اه.......افتكرت

محمد فاضل كنت قلقانة عليه جدا جدا جدا بسسب اني عرفت ان منعقد ليه مجلس تاديب في الكلية و دوخت علشان اطمن عليه فشلت في البداية لكتي نجحت بعدين

و بالفعل كلمني و طمني عليه

بجد فرحانة باصحابي قوي

ربنا يبارك لي فيهم

فعلا...............اصحابي و حبايبي

ملاحظة: الصور دي اولها رمز مدونة مينا و التانية رائعة غالي شكري اللي بيعتز احمد بيها مالقيتش اجمل من كده اعبر بيه عنهم

صديق و انسان

هو صديق بكل معنى الكلمة وقبل ده هو انسان برضه بكل ما تحمل الكلمة من معنى

بداية تعارفنا كان مجرد تليفون علشان نحضر لدورة تدريبية لشباب الاحزاب المصرية

و اللي ما كنتش متوقعاه ان الدورة دي اخرج منها بكم صداقات كبير في عددها و معناها

منهم شباب من الوفد و كفاية و الوطني و الديمقراطي تحت التاسيس و الاخوان المسلمين و انا كنت من الغد و اتنين تاني من زمايلنا و طبعا احمد ذكي عثمان

اتجمعنا تحت سقف واحد رغم اختلافاتنا الفردية لكن اللي كان بيربطنا هو الود و الحب و الالفة و التسامح

بجد وحشتوني